SSPP တပ်စခန်းကို RCSS ဝင်ရောက်တိုက်ခိုက်ပြီး တပ်ဖွဲ့ဝင် ၈ ဦးကို ဖမ်းဆီး ခေါ်ဆောင်

ရှမ်းပြည်နယ် တောင်ပိုင်း မိုင်းကိုင်မြို့နယ်က  ရှမ်းပြည်တိုးတက်ရေးပါတီ/ရှမ်းပြည်တပ်မတော် SSPP/SSA တပ်စခန်းငယ်နှစ်ခုကို ရှမ်းပြည်ပြန်လည် ထူထောင်ရေးကောင်စီ RCSS တပ်ဖွဲ့ ကဝင်ရောက်တိုက်ခိုက်ပြီး တပ်ဖွဲ့ဝင် ၈ ဦးကို ဖမ်းဆီး ခေါ်ဆောင်သွားသည်။ 

ယနေ့နိုဝင်ဘာလ ၂၅ ရက် နံနက် ၅ နာရီခွဲ အချိန်တွင်RCSS စစ်ကြောင်းနှစ်ကြောင်းသည် မိုင်းကိုင်မြို့နယ် တုံလောကျေးရွာအုပ်စု ပန်ပွဲ ကျေးရွာအနီးရှိ SSPP/SSA တပ်စခန်းငယ်နှစ်ခုကို ဝင်ရောက်တိုက်ခိုက်ပြီး တပ်သား(၄)ဦးအား ဖမ်းဆီးသွားကာ စခန်းသုံး မော်တောဆိုင်ကယ်(၄) စီး ၊ ကားတစ်စီး အပါ အဝင် စခန်းများကို မီးရှို့ဖျက်စီးခဲ့ကြောင်း SSPP Info မှထုတ်ပြန်သည်။ 

Photo - SSPP Info

RCSS စစ်ကြောင်းတကြောင်းသည် ပန်ပွဲကျေးရွာက ရွာကော်မတီဝင်တစ်ဉီး၏နေအိမ်ကို လက်နက်ကြီး/ငယ်ဖြင့် ပစ်ခတ်တိုက်ခိုက်ပြီး နေအိမ်အတွင်းရှိအဖိုးတန် ရွှေငွေ ပစ္စည်းများ မွှေနှောက်ယူဆောင်ကာ အိမ်ရှင်ဖြစ်သူ အား ပစ်ခတ်သတ်ဖြတ်၍ နေအိမ်ကို မီးရှို့ဖျက်ဆီးခဲ့ကြောင်း သိရသည်။

ထို့နောက် ပန်ပွဲကျေးရွာအတွင်းရှိ SSPP/SSA တပ်ဖွဲ့ဝင် (၄) ဦးနှင့် ဒေသခံပြည်သူ (၁) ဦးအား ထပ်မံ ဖမ်းစီး သွားခဲ့ကြောင်း SSPP Info မှထုတ်ပြန်သည်။ 

ဌင်းပြင် ပန်ပွဲကျေးရွာအနောက်ဖက်ရှိ ဒေသခံ ဒေါ်ရွှေယိင်း၏ ကုန်စုံဆိုင်ကို RCSS  တပ်ဖွဲ့ဝင်များက ဝင်ရောက်မွှေနှောက် ဖျက်ဆီးပြီး ဆိုင်အတွင်းရှိ စားသောက်ဖွယ်ရာကုန်ပစ္စည်းများနှင့် ရွှေငွေများကိုလည်း ယူဆောင်သွား ကြောင်း သိရသည်။

Bagan News Agency