ငဖဲမြို့နယ် တိုက်ပွဲများတွင် စစ်ကောင်စီ ဗိုလ်ကြီးအပါ ၁ဝ ဦးထက်မနည်းသေဆုံး

မကွေးတိုင်း၊ မင်းဘူးခရိုင်၊ငဖဲမြို့နယ် အမ်း-ပဒါန်းလမ်းပိုင်းရှိ တိုက်ပွဲများတွင် စစ်ကောင်စီ ခမရ (၁၁၃) မှ ဗိုလ်ကြီး (၂) ဦးအပါအဝင် (၁၂) ဦးကို အရှင်ဖမ်းဆီးနိုင်ခဲ့ပြီး ဗိုလ်ကြီး (၂) ဦး၊ အရာခံဗိုလ် (၁) ဦးအပါအဝင် (၁ဝ) ဦးထက်မနည်းသေဆုံးခဲ့ကြောင်း လူထုတော်လှန်ရေးမဟာမိတ်အင်အားစု (PRA-Magway) မှ ယနေ့ထုတ်ပြန်သည်။ 

Photo - PRA-Magway

ပြီးခဲ့သည့် ဇန်နဝါရီလ (၇) ရက်နေ့တွင် အမ်း-ပဒါန်းလမ်းပိုင်းရှိ ဂုတ်ကြီးရွာမှ ခွန်ဇူကျေးရွာသို့ စစ်ကြောင်းထိုးလာသော အင်အား (၃ဝ) ခန့် ပါဝင်သော စစ်ကောင်စီ စစ်ကြောင်းကို ခြုံခိုတိုက်ခိုက်ခဲ့ပြီး စစ်ကောင်စီ ဘက်မှ (၄) ဦးသေဆုံးကာ(၃) ဦးဒဏ်ရာရရှိခဲ့ကြောင်း ထုတ်ပြန်ချက်တွင်ဖော်ပြသည်။

ဌင်းပြင် ဇန်နဝါရီလ (၁၉) ရက်နေ့တွင် ငဖဲမြို့နယ်၊ အမ်း-ပဒါန်းလမ်းပိုင်း၊ ဂုတ်ကြီးကျေးရွာအနောက်ဘက် မီတာ ၂၅ဝဝ ခန့်အကွာ၌ ပဒါန်းဘက်မှတက်လာသော စစ်ကောင်စီအင်အား (၁ဝဝ) ခန့် ပါဝင်သော ခဲယမ်းတင်ကား (၄) စီးကို PRA-Magway မှ ကြားဖြတ် တိုက်ခိုက်ခဲ့သည်။ 

ဌင်းတိုက်ပွဲတွင် စစ်ကောင်စီကား (၁) စီး ပျက်စီးသွားခဲ့ပြီး (၅) ဦးသေဆုံးကာ (၈) ဦးဒဏ်ရာ ရရှိခဲ့ကြောင်းသိရသည်။ 

ထို့ပြင် ရခိုင်-မကွေးနယ်စပ်မျဉ်းတလျှောက်တွင်လည်း တိုက်ပွဲများဖြစ်ပွားလျှက်ရှိသည်။ 

ဇန်နဝါရီလ အတွင်း တပ်မ (၉၉) လက်အောက်ခံတပ်ရင်းများနှင့် ထိတွေ့မှုများရှိခဲ့ကာ စစ်ပွဲများမှထွက်ပြေးလာသော စစ်ကောင်စီ တပ်ဖွဲ့ဝင်များကို ပိတ်ဆို့ဖမ်းဆီးခြင်းများလည်း ဆောင်ရွက်လျက်ရှိကြောင်း PRA-Magway မှ ထုတ်ပြန်သည်။ 

တိုက်ပွဲများမှ ၆ဝ မမ ကွန်မန်ဒိုစိန်ပြောင်း (၁) လက်၊ လက်နက်ငယ် (၈) လက်နှင့် ခဲယမ်းများ၊ စစ်အသုံးအဆောင်များ သိမ်းဆည်းရရှိခဲ့ပြီး မြေပြန့်ဒေသများအထိ ထိုးစစ်အရှိန်မြှင့်တင် သွားမည်ဟု PRA-Magway မှ ထုတ်ပြန်သည်။ 

Bagan News