သာယာဝတီအကျဉ်းထောင်တွင် နိုင်ငံရေးအကျဉ်းသား ကိုသူရအောင် ကျဆုံး

ပဲခူးတိုင်း သာယာဝတီအကျဉ်းထောင်တွင် ဖမ်းဆီးအကျဉ်းချခံထားရသည့် နိုင်ငံရေးအကျဉ်းသား ကိုသူရအောင်သည် ဇန်နဝါရီလ(၅)နေ့၌ ကျဆုံးခဲ့ကြောင်း မြန်မာနိုင်ငံလုံးဆိုင်ရာနိုင်ငံရေးအကျဉ်းသားများကွန်ရက်(PPNM) မှထုတ်ပြန်သည်။ 

သာယာဝတီအကျဉ်းထောင် အမျိုးသားဆောင် အဆောင်(၄)တွင် လက်နက်ပုဒ်မ ၂၃(က)ဖြင့် စစ်ခုံရုံးမှထောင်ဒဏ်(၃)နှစ် အပြစ်ချမှတ်ခံထားရသည့် အသက်(၃၂)နှစ်အရွယ် နိုင်ငံရေးအကျဉ်းသား ကိုသူရအောင်(ခ)ကိုကုလားကြီးသည်  ရုတ်တရက်နှလုံးဖောက်ခြင်းရောဂါကြောင့် ကျဆုံးခဲ့သည်ဟု အကျဉ်းထောင်တာဝန်ရှိသူများထံမှ သိရသည်။

ဓာတ်ပုံ - PPNM

ကိုသူရအောင်အား ၂ဝ၂၄ ခုနှစ် ဇွန်လ ၂၃ ရက်တွင် ရန်ကုန်တိုင်း၊ မြောက်ဥက္ကလာပမြို့နယ်ရှိ နယ်ထိန်းရဲတပ်ဖွဲ့ဝင်များမှဖမ်းဆီးခဲ့သည်။

ဖမ်းဆီးချိန်တွင်  ကိုသူရအောင်သည် နှလုံးနှင့်ပက်သက်၍ ရောဂါမရှိပဲ ကျန်းမာသန်စွမ်းသူတစ်ဦးဖြစ်ကြောင်း သိရှိရသည်။ 

ယခုကဲ့သို့ ရုတ်တရက်နှလုံးဖောက်ခြင်းကြောင့် သေဆုံးရသည်ဟူသည့် အကျဉ်းထောင်အာဏာပိုင်များ၏ပြောဆိုချက်အား မှန်ကန်မှုရှိမရှိ စီစစ်ရန်လိုအပ်ကြောင်း PPNM အဖွဲ့က ထုတ်ပြန်သည်။

၂ဝ၂၄ ခုနှစ်အတွင်း ထောင်အာဏာပိုင်များက  နိုင်ငံရေးအကျဉ်းသားများ အပါအဝင် အကျဉ်းသားများအတွက် ဆေးဝါးပို့ဆောင်ခွင့် ကန့်သတ်လိုက်သည့်အတွက် အကျဉ်းသားများအတွက် လိုအပ်သည့်ဆေးဝါးများပို့ဆောင်ရန် ခက်ခဲလာပြီး ထောင်တွင်း ကျန်းမာရေးစောင့်ရှောက်မှု အခြေအနေများ အလွန်ဆိုးရွားလာနေကြောင်း သိရသည်။

ထောင်တွင်း၌ ဆေးဝါးမလုံလောက်ခြင်း၊ ဆေးဝါးစောင့်ရှောက်မှုလုံလောက်စွာမပေးခြင်း ၊ ထောင်တွင်း ကျန်းမာရေး အရေးပေါ် ဖြစ်သည့် အခါများတွင် ဆရာဝန်များ အချိန်မှီလာရောက်ကြည့်ရှု ကုသမှု မရရှိခြင်း၊ထောင်တွင်း နာတာရှည်ရောဂါခံစားနေရသူ နိုင်ငံရေးအကျဉ်းသားများကို ထောင်ပြင်ပ ‌ဆေးရုံများသို့ သွားရောက်ကုသခွင့် မရခြင်းတို့ကြောင့် လစဉ် နိုင်ငံရေးအကျဉ်းသား/အကျဉ်းသူများ အသက်ပေးနေကြရကြောင်း PPNM မှသိရသည်။

ပြီးခဲ့သည့် ဇန်နဝါရီလ(၁ဝ)ရက်နေ့ကလည်း ပဲခူးတိုင်း ဒိုက်ဦးအကျဉ်း‌ထောင်တွင် ပုဒ်မ၅၁(ဂ)/၅၂(ခ)တို့ဖြင့်  ထောင်ဒဏ်(၁၁)နှစ် အကျဉ်းချခံထားရသူ နိုင်ငံရေးအကျဉ်းသား မျိုးမင်းဦးသည် ထောင်ကျနေစဉ်အတွင်း လုံလောက်သည့် အခြေခံကျန်းမာရေး စောင့်ရှောက်မှု မရရှိခဲ့ခြင်းကြောင့်  ဆီးကျောက်ရောဂါကြောင့် ကျဆုံးခဲ့သည်။

Bagan News