နောင်ချိုတွင် စစ်ကောင်စီ ဗုံးကြဲတိုက်ခိုက်မှုကြောင့် သုံးရက်အတွင်း ၄ ဦးသေဆုံး

ရှမ်းပြည်နယ် တအာင်းတပ် TNLA ထိန်းချုပ်ရာ နောင်ချိုမြို့ကို စစ်ကောင်စီတပ်မှ ဂျက်ဖိုက်တာဖြင့် ဗုံးကြဲတိုက်ခိုက်မှုကြောင့် သုံးရက်အတွင်း ၄ ဦးသေဆုံး ခဲ့သည်။

ပြီးခဲ့သည့် ဖေဖော်ဝါရီလ ၁၉ ရက် ညဦးပိုင်းတွင် နောင်ချိုမြို့ ဘူတာရပ်ကွက်နှင့် ပြည်သူ့ဆေးရုံပေါ် စစ်ကောင်စီတပ်မှ ဗုံး (၂)လုံး လာရောက်ကြဲချတိုက်ခိုက်ခဲ့သည်။

ထိုဗုံးကြဲတိုက်ခိုက်မှုကြောင့် ဘူတာရပ်ကွက်တွင်နေထိုင်သည့် ဒေသခံ (၂)ဦး ပြည်သူ့ဆေးရုံအနီး ဒေသခံ (၁)ဦး စုစုပေါင်း (၃) ဦးသေဆုံးခဲ့သည်။

ဌင်းပြင် ဖေဖော်ဝါရီလ ၁၉ ရက် ညဦးပိုင်းဗုံး (၂)လုံး ကြဲချတိုက်ခိုက်မှုကြောင့် ဒေသခံ (၄)ဦး ထိခိုက်ဒဏ်ရာ ရရှိခဲ့သည်။

ယမန်နေ့ ဖေဖော်ဝါရီလ ၂ဝ ရက် ညတွင် စစ်ကောင်စီတပ်မှ ဂျက်ဖိုက်တာဖြင့် ပေါင် (၅ဝဝ) ဗုံး (၂)လုံး လာရောက်ကြဲချတိုက်ခိုက်မှုကြောင့် နောင်ချိုမြို့နယ်၊ လောက်ဖန်းကျေးရွာ မှ ဒေသခံ (၁)ဦး သေဆုံးပြီး ကလေးငယ်အပါ (၄)ဦး ထိခိုက်ဒဏ်ရာရရှိခဲ့သည်။

ထို့အပြင် ကားတစ်စီးနှင့် နေအိမ် (၆)လုံး ထိခိုက်ပျက်စီး ခဲ့သည်။

ယနေ့ ဖေဖော်ဝါရီလ ၂၁ ရက် နံနက်တွင်လည်း စစ်ကောင်စီတပ်မှ  ဒရုန်းအသုံးပြုပြီး နောင်ချိုမြို့နယ် အုမ္မတီးကျေးရွာ ဘုန်းကြီးကျောင်းအား ဗုံး (၄)လုံး လာရောက်ကြဲချတိုက်ခိုက်မှုကြောင့် ကျောင်းဆောင်အများအပြား ပျက်စီးခဲ့သည်။

ပြီးခဲ့သည့် ဖေဖော်ဝါရီလ ၁၅ ရက်တွင် TNLA ကိုယ်စားလှယ်များသည် တရုတ်အစိုးရ စီစဉ်ချက်အရ မြန်မာကိုယ်စားလှယ်များနှင့်တွေ့ဆုံရန် တရုတ်နိုင်ငံ ယူနန်ပြည်နယ်၊ ကူမင်းမြို့သို ရောက်ရှိနေချိန် စစ်ကောင်စီတပ်မှ TNLA ထိန်းချုပ်ရာ နောင်ချိုမြို့နယ်အား Y-12 လေယာဉ်အသုံးပြုပြီး ဗုံး (၁၇၅)လုံး ပစ်ခတ်တိုက်ခိုက်ခဲ့သည်။

ဖေဖော်ဝါရီလ ၁၆ နှင့် ၁၇ ရက်တို့တွင် ဒုတိယဗိုလ်ချုပ်ကြီး တားဂျုတ်ဂျား ဦးဆောင်သည့် ပလောင်ပြည်နယ်လွတ်မြောက်ရေးတပ်ဦး PSLF/TNLA၏ ကိုယ်စားလှယ်များနှင့် စစ်ကောင်စီ ကစထ(၁) မှူး ဒုတိယဗိုလ်ချုပ်ကြီး ကိုကိုဦး ဦးဆောင်သည့် စစ်ကောင်စီတပ်ကိုယ်စားလှယ်တို့ ကူမင်းမြိုရှိ ဟိုင်ဂင်ဟော်တယ်တွင် တွေ့ဆုံဆွေးနွေးခဲ့ကြသည်။

ဆွေးနွေးပွဲတွင် နှစ်ဖက်တောင်းဆိုတင်ပြမှုများ အပြန်အလှန်ပြုလုပ်ခဲ့ကြပြီး၊ ဆွေးနွေးညှိနှိင်းရန် ခက်ခဲသဖြင့် ဖေဖော်ဝါရီလ၁၇ ရက်နေ့ ညနေပိုင်းတွင် တွေ့ဆုံပွဲ ပြီးဆုံးခဲ့သည်ဟု TNLA ကထုတ်ပြန်သည်။

Photo - TNLA

Bagan News