ပြည်ထောင်အတွင်း သေနတ်ဖောက်ကာ နိုင်ငံရေးအကျဉ်းသားများကို ရိုက်နှက်

ပဲခူးတိုင်း၊ ပြည်အကျဉ်းထောင်၌ ယနေ့နံနက်ပိုင်းတွင် သေနတ်ဖောက်ကာ နိုင်ငံရေးအကျဉ်းသားများကို ရိုက်နှက်မှုဖြစ်ပွားခဲ့သည်။

ယနေ့နံနက် ၇ နာရီခွဲ အချိန်ခန့်တွင် စားရိပ်သာတာဝန်ခံ (ဖိုခေါင်း)ဖြစ်သူ အကျဉ်းသားလင်းထိန် ဆိုသူမှ လက်သီးဖြင့် နိုင်ငံရေးအကျဉ်းသားတဦးကို ထိုးခဲ့သည်။

နိုင်ငံရေးအကျဉ်းသားအား ထိုးခံခဲ့ရမှုဖြစ်စဉ်နှင့်ပတ်သက်၍ ပြည်အကျဉ်းထောင်အတွင်းရှိ နိုင်ငံရေးအကျဉ်းသား(၁၀၀)ကျော်ခန့်မှ မိန်းဂျေးရှေ့သို့ သွားရောက်ပြီး ထောင်မှူး(နှစ်ပွင့်အရာရှိ) ဦးကျော်အောင် ထံသို့ ကျူးလွန်သူ လင်းထိန် အား အရေးယူပေးပါရန် ငြိမ်းချမ်းစွာတင်ပြတောင်းဆိုခဲ့သည်။

ဌင်းကဲ့သို့ ဆောင်ရွက်နေစဉ် အကျဉ်းထောင်ဗဟိုကင်းမှ သေနတ်(၂)ချက် ပစ်ဖောက်ခဲ့သည်။

အကျဉ်းထောင်ဝန်ထမ်း တပွင့်အရာရှိ တေဇာဝင်း ၏ မိန့်ပေးစေခိုင်းမှုဖြင့် ထောင်ဝန်ထမ်း ဥက္ကာမိုး ပါ(၂)ဦးနှင့် အခြားရာဇဝတ်အကျဉ်းသား စူပါဖိုး၊အခန်းစာရေးငတိ ပါအဖွဲ့တို့မှ ဝါးဆစ်တုတ်များ၊ သစ်သားတုတ်များ၊ ဓါးများကိုင်ဆောင်ပြီး နိုင်ငံရေးအကျဉ်းသားများအား ဝင်ရောက်ရိုက်နှက်ပြီး ခြိမ်းခြောက်မှုပြုလုပ်ခဲ့သည်။

ဝင်ရောက်ရိုက်နှက်မှုကြောင့် နိုင်ငံရေးအကျဉ်းသား(၅)ဦးမှာ ဖူးယောင်ဒဏ်ရာ၊ ဦးခေါင်းပေါက်ပြဲဒဏ်ရာ၊ ခြေထောက် ပေါက်ပြဲ ပွန်းပဲ့ဒဏ်ရာများ ရရှိခဲ့ကြသည်။

နိုင်ငံရေးအကျဉ်းသားများမှ မတရားဖိနှိပ်မှုမပြုရန်နှင့် ဥပဒေနှင့်အညီ ဖြေရှင်းဆောင်ရွက် အရေးယူပေးရန် ဆက်လက်တောင်းဆိုထားကြပြီး နိုင်ငံရေးအကျဉ်းသားများနှင့်အတူ ရပ်တည်သွားမည်ဟု မြန်မာနိုင်ငံလုံးဆိုင်ရာနိုင်ငံရေးအကျဉ်းသားများကွန်ရက်(PPNM)မှထုတ်ပြန်သည်။

၂ဝ၂၁ ခုနှစ် ဖေဖော်ဝါရီလ ၁ ရက်နေ့ မတရားစစ်အာဏာလုမှုဖြစ်စဉ် စတင်ချိန်မှ ၂ဝ၅ ခုနှစ် ဖေဖော်ဝါရီလ ၂၁ ရက်နေ့ အထိ စစ်ကောင်စီ၏ ဖမ်းဆီးခံခဲ့ရသူ စုစုပေါင်း (၂၈၆၃၇) ဦးရှိပြီး ထိုအထဲမှ (၂၁၈၈၇) ဦးမှာ ထိန်းသိမ်းခံနေရဆဲဖြစ်ကြောင်း နိုင်ငံရေးအကျဉ်းသားများ ကူညီစောင့်ရှောက်ရေးအသင်း (အေအေပီပီ) မှထုတ်ပြန်သည်။

Bagan News

Website(Blog) https://www.bagannews.org/

Facebook https://www.facebook.com/Bagannewstv

Youtube https://www.youtube.com/@BaganNews/videos

Telegram https://t.me/bagannews