စစ်အာဏာသိမ်း ၅ နှစ်အတွင်း လူ့အခွင့်အရေးချိုးဖောက်မှုများနှင့် ဆိုးရွားသောဒုက္ခများနှင့် ရင်ဆိုင်နေရ

 မြန်မာနိုင်ငံတွင် စစ်အာဏာသိမ်း ၅ နှစ်အတွင်း တိုးမြင့်လာသောအကြမ်းဖက်မှုများ၊ ကျယ်ပြန့်စွာဖြစ်‌ပေါ်နေသောလူ့အခွင့်အရေးချိုးဖောက်မှုများနှင့် ဆိုးရွားသောလူသားချင်းစာနာမှုဆိုင်ရာဒုက္ခများနှင့် ရင်ဆိုင်နေရကြောင်း မြန်မာနိုင်ငံဆိုင်ရာ သြစတြေးလျနိုင်ငံ သံရုံးကထုတ်ပြန်သည်။ 

၂၀၂၁ ခုနှစ်၊ ဖေဖော်ဝါရီ ၁ ရက်နေ့မှစ၍ မြန်မာပြည်သူများသည် အာဏာသိမ်းမှုကြောင့်ဖြစ်ပေါ်လာခဲ့သောဤအကျပ်အတည်းသည် ဆက်လက်ဖြစ်ပွါးနေဆဲဖြစ်သည်။ ၂၀၂၆ ခုနှစ်တွင် ခန့်မှန်းခြေလူပေါင်း ၁၆.၂ သန်းသည် အသက်ကယ်လူသားချင်းစာနာမှုအကူအညီများကိုလိုအပ်မည်ဖြစ်ပြီး လူပေါင်း ၃.၆ သန်းကျော်သည် ဆက်လက်ဖြစ်ပွားနေသောပဋိပက္ခကြောင့် နိုင်ငံအတွင်းနေရပ်စွန့်ခွာရွှေ့ပြောင်းနေရကြောင်း ဖော်ပြသည်။ 

စီးပွားရေးသိသိသာသာကျဆင်းသွားခဲ့ပြီး နယ်စပ်ဖြတ်ကျော်အရေးကြီးမှုခင်းများ ပိုမိုကြီးထွားလာကာ ဒေသတွင်းတည်ငြိမ်မှုကိုခြိမ်း‌ခြောက်နေသည်။ မကြာသေးမီကပြုလုပ်ခဲ့သော စစ်အာဏာရှင်အဖွဲ့အစည်း၏ရွေးကောက်ပွဲများသည် ဆက်လက်ဖြစ်ပွားနေသောအကြမ်းဖက်မှုနှင့်ဖိနှိပ်မှုများအကြား အတိုက်အခံပါတီများ၏အဓိပ္ပာယ်ပြည့်ဝစွာပါဝင်မှုမရှိပဲ ပြုလုပ်ခဲ့ခြင်းဖြစ်သည်။ ၄င်းတို့သည် လွတ်လပ်၍တရားမျှတပြီး လူတိုင်းအကျုံးဝင်သည့်ရွေးကောက်ပွဲအခြေအနေများနှင့် မပြည့်မီခဲ့ကြောင်း ထုတ်ပြန်သည်။ 

သြစတြေးလျအနေဖြင့် မြန်မာလူထုအပေါ် စစ်အာဏာရှင်အဖွဲ့အစည်း၏ ရက်စက်သော ဆက်လက်ကြမ်းကြုတ်မှုများနှင့်ပက်သက်၍ ဆက်လက်ဝေဖန်နေမည်ဖြစ်ကြောင်း ထုတ်ပြန်သည်။ 

နောက်လာမည့်မြန်မာတာဝန်ရှိသူများအနေဖြင့် အရပ်သားပြည်သူများအပေါ်အကြမ်းဖက်မှုများရပ်တန့်ခြင်း၊ လိုအပ်နေသူအားလုံးကို ခွဲခြားမှုမရှိပဲ လူသားချင်းစာနာမှုအကူအညီများဆီ လုံခြုံစွာအဟန့်အတားမရှိ လက်လှမ်းမီစေခြင်းနှင့် မတရားသဖြင့်ထိန်းသိမ်းထားသူအားလုံးကိုလွှတ်ပေးရန် ဆက်လက်တောင်းကြောင်း မြန်မာနိုင်ငံဆိုင်ရာ သြစတြေးလျနိုင်ငံ သံရုံးကထုတ်ပြန်သည်။ 

- Photo - Bagan News / Archive

၂၀၂၁ ဖေဖော်ဝါရီလနောင်းပိုင်း ရန်ကုန်မြို့မြင်ကွင်း။

- BAGAN NEWS