ကရင်နီ နှင့် ရှမ်းပြည်နယ်တွင် စစ်ကောင်စီတပ်မှ အဆိပ်ငွေ့ဗုံးများ ကြဲချတိုက်ခိုက်

ကရင်နီ(ကယား)ပြည်နယ် နှင့် ရှမ်းပြည်နယ် နယ်စပ်အချို့နေရာများတွင် စစ်ကောင်စီတပ်မှ ဒရုန်းများဖြင့် ဗုံးကြဲ တိုက်ခိုက်မှုများ လုပ်ဆောင်ရာတွင် အဆိပ်ငွေ့ပြားများ ထည့်သွင်းအသုံးပြုလာပြီဖြစ်ကြောင်း ကရင်နီအမျိုးသားများကာကွယ်ရေးတပ် (KNDF)က ယနေ့ထုတ်ပြန်သည်။

၂၀၂၄ ခုနှစ် ၊ ဒီဇင်ဘာလ (၇)၊ (၈)ရက်နေ့များတွင် မိုးဗြဲမြို့ပြင်၌အခြေစိုက်ထားသော ခမရ (၄၂၂)တပ်မှ မိုးဗြဲမြို့နှင့် ပတ်ဝန်ကျင်များအား ဒရုန်းဖြင့် ဗုံးကြဲတိုက်ခိုက်ရာတွင် S-PHOS ( အက်စ်ဖော့စ် )တံဆိပ်ပါ  ၅၆၀ အဆိပ်ငွေ့ပြားများကို ထည့်သွင်း အသုံးပြု၍ တိုက်ခိုက်ခဲ့ကြောင်း KNDF ကဆိုသည်။

အဆိုပါ အဆိပ်ငွေ့ပြားများ ထည့်သွင်းထားသည့် ဗုံးသီးကျရောက်ရာ အနီးဝန်ကျင်တွင် မီးခိုးများ အများအပြားထွက်လာပြီး ရှုရှိက်မိသော ရဲဘော်အချို့မှာ မူးဝေခြင်း ၊ ခေါင်းမူးခြင်း ၊ အော့အန်လိုခြင်း ၊ အိပ်ချင်လာခြင်း၊ ခန္တာကိုယ်မလန်းဆန်းခြင်း၊ အားပြက်ခြင်း စသည့်ဝေဒနာများခံစားခဲ့ရကြောင်း ထုတ်ပြန်ချက်တွင် ဖော်ပြထားသည်။

ဒရုန်းဖြင့် လာရောက်တိုက်ခိုက် ချိန်တွင် ထိခိုက်မှုများမရှိခဲ့သော်လည်း  ဗုံးသီးကျရောက်ခဲ့သော နေရာများအား စစ်ဆေးခဲ့ရာ အက်စ်ဖော့စ်အဆိပ်ငွေ့ပြားများကို ထည့်သွင်းအသုံးပြု၍ တိုက်ခိုက်ခဲ့သည်ကို အတည်ပြုနိုင်ခဲ့ကြောင်းKNDF ကထုတ်ပြန်သည်။

ပြည်သူများအနေဖြင့် အနီးဝန်ကျင်တွင် ဒရုန်းများ ပျံဝဲနေခြင်း ၊ တိုက်ခိုက်ခံရသည့် နေရာများနှင့်အနီးတွင်ရှိနေခြင်းများ ဖြစ်လာပါက စူးစမ်းကြခြင်းမျိုးမပြုလုပ်ဘဲ လုံခြုံသောနေရာ များသို့ ပုန်းခို၍ ရှောင်ရှားကြရန် KNDF ကအထူးအသိပေးသည်။ 

ဖယ်ခုံ၊ မိုးဗြဲ ၊ လွိုင်ကော် လမ်းမကြီးပေါ်တွင် စစ်ကောင်စီတပ်ဖွဲ့များနှင့် တော်လှန်ရေးတပ်ဖွဲ့များအကြား ထိတွေ့မှုများ ကြိုကြားဖြစ်ပွားလျှက်ရှိနေပြီး စစ်ကောင်စီဖက်မှ အဆိပ်ငွေ့များပါ ထည့်သွင်းကာ ဒရုန်းစစ်ဆင်ရေးများလုပ်ဆောင်လာနေကြောင်း KNDF ကထုတ်ပြန်သည်။

Photo - KNDF / စစ်ကောင်စီအသုံးပြုခဲ့သည့်အဆိပ်ငွေ့ပြားများ။

Bagan News